【台語日常】 號名

文/劉靜娟 |2020.11.03
1381觀看次
字級

文/劉靜娟

沈太太講伊單名叫做「末」。

我問伊是毋是上屘的?伊講毋是,下面猶有一个小妹。「阮兜(tau,家)是做田的,我出世彼年歹年冬,阮老爸講『今年收成真末』,就共我號做末。」

號名遮爾(tsiah-nī,這麼)凊彩、遮爾寫實?一般人共囡仔號名敢毋是用較正面、對未來有向望的字?時機歹,向望明年收成較好、號做「好」,應當是較合理啊。

阮阿公叫做「滿」,阿伯叫做「甲」。米間(穀倉)滿滿,田園幾若甲,阮媽媽按呢解說;雖然離事實真遠。

我問沈太太,伊的小妹叫啥名?和收成有關係無?伊講無,小妹叫做「罔腰」。罔腰(育)、罔市(飼)這款名以前真濟;這陣,真稀罕矣。

伊講田庄所在,真濟代誌靠家己。in (她們)老母生第一胎的時,阿媽家己抾囡仔(接生),教新婦按怎生,按怎轉臍;第二个開始,老母就家己生,家己轉臍矣。生到上尾的小妹,因為拚血(血崩),人昏死去;大人拍拚救產婦,竟然袂記得包好好、「囥」(khǹg,放)佇厝內眠床角的嬰仔。到第三工,才想著,有夠譀(hàm,誇張)。嬰仔無háu(哭),恬恬欶(吸)家己的指頭仔 。「阮阿妗講,伊遮爾耐命,既然欲做咱的囡仔,咱就罔育。」所以就共伊號做罔腰。

好咧這个查某囡仔捌(懂)事的時,就家己去改名。

以前的人普遍毋捌字,阮阿姑的名嘛是凊彩號,大的叫做gâu,第二个叫做uī,第三个叫做kiann。大姑早早就過身,阮無見過;二姑、三姑和阮真親,阮佮in講耍笑,「阿公生第一个查某囝,感覺真gâu,第二个就畏(膩),第三个就驚。」

幾年前,小弟為著欲了解家族故事,去申請日本時代的戶口簿仔,才知影in字紙頂的名,是賢、謂(uī)和驚。彼陣報戶口著經過保正(今日里長),較有漢文學養的保正,會揣(tshuē,找)較有意義的字來用;阿驚阿姑運氣較差,拄(tú,遇見)著的可能是捌字無偌濟的。

聽講有號做「豬哥」的,伊戶口的名寫做「知高」;可見伊拄著有學問的保正。

熱門新聞
訂閱電子報
台北市 天氣預報   台灣一週天氣預報

《人間福報》是一份多元化的報紙,不單只有報導佛教新聞,乃以推動祥和社會、淨化人心為職志,以關懷人類福祉、追求世界和平為宗旨,堅持新聞的準度與速度、廣度與深度,關懷弱勢族群與公益;強調內容溫馨、健康、益智、環保,不八卦、不加料、不阿諛,希冀藉由優質的內涵,體貼大眾身心靈的需要、關懷地球永續經營、延續宇宙無窮慧命,是一份承擔社會責任的報紙。自許成為「社會的一道光明」的《人間福報》任重而道遠,在秉持創辦人星雲大師「傳播人間善因善緣」的理念之際,更將堅持為社會注入清流,讓福報的發行為人間帶來祥和歡喜,具體實現「人間有福報,福報滿人間」的目標。

App

聯絡我們 隱私權條款

Copyright © 2020 人間福報 www.merit-times.com
All Rights Reserved.